عائلــه الموته

الجزء الأول
الموت.......
الموت بالنسبة ل ناس كتير هو خوفهم الأكبر......ولكن للناس اللي زيي واللي شاف الموت أكثر من مرة الموت راحه ليه وارحم له من اللي بيشوفه أو اللي بيتهيأله انه بيشوفه......ولكن سواء كان حقيقه أو خيال ف اللي انا عارفه أني في كل مره انا بعيش الموت ..........
طيب علشان مطولش عليكوا انا هدخل في الموضوع علي طول وزي أي حد هبدا بتعريف نفسي انا اسمي محمد عبدالخالق طالب في كلية طب والحمدلله.........ولكن المشكلة أن التنسيق كان سبب في انى اروح أسوان..... مع اني أصلا من الغربيه. ......المهم جهزت نفسي علشان اروح أسوان كان سفر متعب جداً ولكن اللي كان أصعب من السفر هو أني الاقي شقه اقعد فيها ولكني للأسف ملقتش واللي لقيته كان غالي جداً يعني استغلال رهيب لحد ما ربنا كرمني ولقيت شقه جميله كدا علي قدي وكانت رخيصة جداً بالنسبة للشقق التانيه ويمكن كمان أكبر منهم ولحسن الحظ انها مكنتش بعيده عن الكليه أحب بس اوصفلكوا البيت هو عباره عن دورين وانا ساكن ف الدور الثاني والأول في سكان... والبيت حواليه أراضي زراعية من كل ناحيه وفي بيت جنبه لكن لسه بيتبني.............
كان مكان مثالي بالنسبة لي هدوء تماما ومش بعيد عن الكليه.........
دخلت الشقه وكانت مترتبه احسن ترتيب احنا لما دخلنا الشقه انا حسيت أن صاحب الشقه اتصدم ولقيته قال بأسم الله الرحمن الرحيم قلت له في حاجه ولا ايه قالي كده وكان باين انه متوتر جدآ..قالي لا لا مفيش بص الشقه اهه يا استاذ اسيبك انا بقا ترتاح وبكره الصبح هاجي علشان نمضي عقد الشقه......
بالفعل مشي وسابني وانا مقدرتش اعمل أي حاجه غير أني انام.....
نمت وصحيت تاني يوم علي خبط باب الشقه واللي كان بيخبط هو الحاج سمير صاحب البيت علشان نكتب عقد الشقه.......
فتحت ورحبت بيه ودخل وكتبنا العقد وكله تمام.......
و وانا نازل رايح الكليه قابلني وانا نازل راجل كده في الأربعينيات ابتسم وقالي انتا الساكن الجديد ف قلت له اه انا الساكن الجديد قالي أهلا بيك نورت بيتك انا اسمي صابر جارك اللي ساكن معاك هنا في الدور الاول قلت له طيب ماشي بس ممكن بقي اروح كليتي علشان اتاخرت قالي اه اتفضل انا اسف اني اخرتك سيبته ومشيت بس قررت اني هروح اعتذرله واتعرف عليه لأنه الراجل كان جاي يتعرف عليا وانا كنت سخيف معاه..........
بالفعل ف نفس اليوم رجعت من الكليه اتغديت وقلت هنزل بقا أتعرف ع الراجل الطيب ده نزلت وخبطت عليه مره واثنين وثلاثة ولا حد بيرد ولا حتى سامع صوت جوا ف قلت يمكن مش هنا.........
ف طلعت شقتي وعادي..........
واليوم الثاني و الثالث والرابع والخامس وبعده وبعده والراجل ملوش أثر ايه ده الراجل أختفي ولا ايه ف لما جه صاحب البيت علشان ياخد إيجار الشهر سألته وقلت له آمال هما فين الناس اللي ساكنين تحت راحو فين قالي بتوتر الناس اللي تحت....
الناس اللي تحت مين قلت له عم صابر وعيلته قالي ايه صابر!!!
وانتا ايه اللي عرفك أن كان في حد هنا اسمه صابر قلتله انا ف مره وانا نازل قابلته وهو عرفني بنفسه وقالي انه جاري و ساكن في الدور الاول ضحك ضحكه مصطنعة وقالي آه هو عمك صابر كده كل كام يوم يسافر ويرجع تاني هو دايما كده وقالي استئذن انا بقي علشان ورايا مشوار......
هو صاحب البيت ده في ايه الراجل ده فيه حاجه مش مظبوطه.... وليه في الأول كان مستغرب اني اعرف صابر وبعدها قالي آه ما هو بيسافر كل شويه........
وبعدين بقي في الناس دي.....بس هو انا ليه اصلا مشغول بالناس دي انا أصلا مبحبش أتعرف ع الناس ودايما في حالي...
خلاص انا من النهارده مليش دعوه بيهم تاني يجي بقا ميجيش انا مليش دعوه..........
نمت و في اليوم اللي بعده صحيت الساعه 3 الفجر على صوت حاجه وقعت في الصاله انا طبعاً قلت ده اكيد حرامي قمت براحه وخدت معايه عصايه كبيره علشان اضربه بيها......
فتحت باب الاوضه وفعلاً كان في واحد واقف مشيت براحه علشان ميحسش بيا وبعد ما قربت منه ولسه هضربه أتلفت لي وهو بيبتسم!!!! ولكنه مكنش حرامي ايوه.....دا كان عم صابر!!!!!
قلتله انتا ايه اللى جابك هنا ايه مفكرني نايم ف جيت تسرق الشقه..........
قالي وهو باين عليه الحزن.... الله يسامحك يابني........ لأ انا مش جاي اسرقك ولا حاجه انا لقيت باب شقتك مفتوح ف دخلت وقالي ساعه بنادى عليك علشان تصحي وتعرف انك نسيت الباب مفتوح.........
قلت له..... ايه ازاي نسيت الباب مفتوح انا متأكد انه كان مقفول قالي وهو لو كان مقفول كنت هدخل هنا ازاي يازكي ايه انتا مفكرني عفريت هفتح الأبواب لما ابصلها شوف على العموم انا اسف اني جيتلك في وقت متأخر زي ده ولكني كنت عايز انبهك والظاهر انى غلطان.............
وسابني ومشي وقفل الباب وراه........
وبعدين بقي في الراجل ده انا لتاني مره أكون سخيف معاه...ف قررت اني أنزل وراه بسرعه واعتذرله على الكلام اللي قلته و وانا نازل على السلم سمعت باب شقته بيتقفل ف خبطت على بابه مره واثنين وثلاثة محدش بيرد ف بدأت أنادي عليه عم صابر..... عم صااابر بردو مفيش رد قلت مش عايز يفتح ف قررت اني هسيبه واطلع شقتي ولكن و انا طالع سمعت صرخه واحده ست فزعتني خارجه من شقه عم صابر........ف نزلت تاني بسرعه وفضلت اخبط ولكن مفيش رد ف كسرت الباب ودخلت جرى علشان اشوف ايه اللي بيحصل دخلت اول اوضه والتانيه ودورت ف الشقه كلها لكن مفيش أثر لأي حد ولسه هخرج الكهرباء اتقطعت!!!!! وسمعت صوت الباب بيترزع!!!! وبدأت اسمع همس مش عارف مصدره ايه لكني قررت اني همشي ورا الصوت لحد ما اعرف مصدره........
وبالفعل مشيت ورا الصوت لحد ما وصلت ل مصدره واللي كان الحمام!!! بس الغريب أن الحمام كان فيه نور مع أن الكهرباء قاطعه في البيت كله وشوفت الآتي....ست في الثلاثينات من عمرها واقفه في الحمام وبتبص ف المرايه وعماله بتتكلم بصوت واطي وبتقول الآتي وهي بتعيط.....انا مليش دعوه انا مليش دعوه... هو السبب هو السبب في اللي حصل انا مليش دعوه وبعدها قالت طيب خلاص انا هجيب لك اللي انت عايزه بس متجيش تاني أرجوك متجيش تاني خلصت الكلام وبدأت تضحك بصوت مفزع واتلفتت لي!!!!!! وكان وشها شااحب جداً وشكله مرعب انا فضلت واقف ف مكاني مقدرتش حتى اتحرك اواهرب.........لكنها معملتش حاجه هي بكل هدوء نزلت في البانيو اللي كان مليان مياه ونامت جواه ولكن كان في خيالات على الحيطه وعلى السقف والاغرب أن صورتها كانت لسه موجوده في المرايا وكأنها لسه واقفه وبدأت ترفع ايدها وكأنها بتستغيث وفي حد هو اللي بيغرقها وكان في خيال على الحيطه ل شخص أو مش شخص انا مش عارف ده ايه لأنه كان طويل جدا لحد ما نزلت ايدها يعني ماتت انا مستنتش علشان اشوف اكتر من كده وجريت وانا مش شايف أي حاجه لحد ما وصلت ل الباب علشان أخرج لكن الباب مقفول فضلت اخبط عليه واصرخ وأقول الحقوني..... الحقوني لكن محدش طبعاً هيسمع و مين اللي ممكن هيسمع انا في بيت موجود في وسط الأراضي الزراعية........ وسامع ورايا أصوات لصرخات بشعه و سامع أصوات حركه في كل مكان حواليا........
والأصوات بدأت تزيد ودرجة الحرارة تزيد و عرفت ان دي اكيد النهاية وخاصه لما لقيت الست اللي المفروض أنها ماتت في الحمام!! ف بدأت اقول رب أعوذ بك من همزات الشياطين وأعوذ بك ربي أن يحضرون وبدأت الصرخات تزيد وهي نفسها تصرخ وخطواتها تبقي اسرع ف اتاكدت ان دي نهايتي........ وقفت قدامي وبدأت تخنقني وانا حتي مش قادر ادافع عن نفسي وهي تخنق اكتر واكتر لحد ما فقدت الوعي...........